“Yay Fest 2022” çərçivəsində “Karyera və İnkişaf” düşərgəsi təşkil edilib

Azərbaycan Respublikasının Gənclər Fondunun təşkilatçılığı və Dövlət Məşğulluq Agentliyinin Mərkəzi Karyera filialının dəstəyi ilə “Yay Fest 2022” çərçivəsində “Karyera və İnkişaf” düşərgəsi təşkil edilib.

 
Düşərgədə 5 gün ərzində Mərkəzi Karyera filialının peşəkar ekspertləri tərəfindən gənclər üçün karyera planlaması istiqamətində təlimlər keçiriləcək, sahə mütəxəssisləri tərəfindən peşələr barədə məlumatlar ötürüləcək, əyləncəli oyunlar və yarışlar təşkil ediləcək.

Nəsirəddin Tusi adına Şamaxı Astrofizika Rəsədxanasında keçiriləcək “Yay Fest 2022” “Karyera və İnkişaf” düşərgəsində iştirakçılar əylənərək öyrənəcək, əmək bazarı və karyera imkanları barədə məlumat əldə etmək imkanı qazanacaqlar.

Qeyd edək ki, “Yay Fest - Azərbaycan Gənclər Festivalı”nın məqsədi gənclər üçün müxtəlif sahələrdə yaradılan geniş imkanların təşviqi, ölkəmizin müxtəlif regionlarında yaşayan gənclərin sosiallaşması, onların müasir peşə və trendlər barədə məlumatlandırılması, əmək bazarında hazırki vəziyyətin təsviri, bazarın xarakteri və tələbləri barədə məlumatlılıq, gələcəyin tələb olunan sahələri və onların xarakterik xüsusiyyətləri barədə agahlıq səviyyələrini artırmaqdan ibarətdir.