“Müasir əmək bazarı işaxtaranlardan daim yeni vərdişlər qazanmağı tələb edir”

Bu fikirləri Dövlət Bədən Tərbiyəsi və İdman Akademiyasında keçirilən əmək yarmarkasında Mustafa Abbasbəyli səsləndirib.

Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi və Azərbaycan Dövlət Bədən Tərbiyəsi və İdman Akademiyasının birgə təşkilatçılığı ilə əmək yarmarkası təşkil edilib.

Akademiyanın məzunları üçün təşkil edilən yarmarkada Dövlət Məşğulluq Agentliyinin İdarə Heyətinin sədri Mustafa Abbasbəyli, Akademiyanın rektoru Fuad Hacıyev, işəgötürənlər, tələbə və məzunlar iştirak edib.

Mustafa Abbasbəyli ilk olaraq Agentliyin faəliyyət istiqamətləri ilə bağlı məlumat verib, son illər ölkəmizdə məşğulluq sahəsində aparılan yenilik və islahatlardan danışıb. Qeyd edib ki, dünyada və ölkəmizdə əmək bazarının tələbləri mütəmadi olaraq dəyişir, yeni çağırışlar formalaşır. Bu isə işaxtaranlardan daim öz üzərində çalışmalarını və yeni əmək vərdişləri qazanmalarını tələb edir. “Məzunların məşğulluq reytinqi” platforması barədə də məlumat verən sədr qeyd edib ki, platforma gələcək əmək bazarının tələblərini müəyyən etməyə və universitetlər arasında rəqabət mühitinin formalaşmasına səbəb olacaq.

Tədbirdə çıxış edən Fuad Hacıyev bildirib ki, bu cür tədbirlər məzunların və tələbələrin əmək bazarına daxil olması, əmək bazarı ilə tanışlığı və öz karyeralarını qurması üçün mühüm əhəmiyyət daşıyır. Rektor Akademiyanın öz məzunlarının karyera imkanlarının genişləndirilməsinə daim diqqətlə yanaşdığını və bunun üçün müxtəlif dövlət və özəl qurumlarla əməkdaşlıq edildiyini bildirib. Azərbaycanın dünyanın nüfuzlu idman yarışlarına ev sahibliyini etdiyini vurğulayan F.Hacıyev məzunların qlobal əmək bazarına hazırlanmasının Akademiyanın əsas hədəflərindən biri olduğunu qeyd edib.

Yarmarkada 47 dövlət və özəl müəssisəsi tərəfindən ümumilikdə 400-dən artıq boş iş yeri təqdim edilib. Tələbə və məzunlara Agentliyin gənclərə yönəlmiş layihələri barədə də məlumat verilib.