Məşğulluq sahəsində Azərbaycan ilə Pakistan arasında təcrübə mübadiləsi aparılıb

Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi və Pakistan İslam Respublikasının Xaricdə Yaşayan Pakistanlılarla İş və İnsan Resurslarının İnkişafı Nazirliyi tabeliyində Xarici Məşğulluq Korporasiyası arasında vörkşop keçirilib. Görüşdə hər iki ölkənin nazirliklərinin nümayəndə heyəti də iştirak edib.

Vörkşop “Azərbaycan Respublikasının Əmək və Əhalinin Sosial Müdafiəsi Nazirliyi ilə Pakistan İslam Respublikasının Xaricdə Yaşayan Pakistanlılarla İş və İnsan Resurslarının İnkişafı Nazirliyi arasında əmək, məşğulluq və sosial müdafiə sahələrində əməkdaşlığı haqqında Anlaşma Memorandumu” çərçivəsində 2023-2024-cü illər üzrə imzalanmış Tədbirlər Planına uyğun olaraq baş tutub.

Hər iki qurumun nümayəndələri məşğulluq sahəsində, xüsusən də peşə hazırlığı və karyera məsləhəti istiqamətində təcrübələrinə dair təqdimatlarla çıxış ediblər. Həmçinin görüşdə Azərbaycanda məşğulluğun təminatında peşə hazırlığı və karyera məsləhəti xidmətinin əhəmiyyəti, innovativ metodlar və uğurlu layihələr barədə ətraflı məlumat verilib.   

Bundan başqa məşğulluq sahəsində gələcək əməkdaşlıq perspektivləri, birgə işlər barədə müzakirələr aparılıb.