Mərkəzi Karyera filialı ilə Ankara Universiteti arasında əməkdaşlıq imkanları müzakirə edilib

Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyinin Mərkəzi Karyera filialının bir qrup əməkdaşı ilə Ankara Universitetinin Karyera Mərkəzinin əməkdaşları və professor heyəti arasında onlayn görüş keçirilib.

Təcrübə mübadiləsinin aparıldığı görüşdə Ankara Universitetinin Karyera Mərkəzinin araşdırma və inkişaf potensialından istifadə etmək, karyera planlaması, bu sahədə edilə biləcək araşdırmalar və onların nəticələrinin akademik heyət və cəmiyyətlə bölüşmə imkanları müzakirə edilib. Sahə üzrə baş verən yeniliklər, bacarıqların inkişafı yolları kimi mövzularda fikir mübadiləsi aparılıb, Filial ilə Universitetin birgə görə biləcəyi işlər haqqında danışılıb.

Müzakirələrə əsasən təcrübə mübadiləsi üçün davamlı onlayn görüşlərin keçirilməsi və birgə tədbirlərin həyata keçirilməsi barədə razılığa gəlinib.