“Gənclərin Məşğulluq Məktəbi 2” yaz düşərgəsi yekunlaşıb

Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi, Azərbaycan Respublikası Gənclər və İdman Nazirliyi və Gənclər Fondunun dəstəyi, “Gənclərin Maarifləndirilməsinə Dəstək” İctimai Birliyinin təşkilatçılığı ilə keçirilən “Gənclərin Məşğulluq Məktəbi 2” yaz düşərgəsi başa çatıb.

5 gün müddətində düşərgədə iştirak edən gənclər üçün peşəkar karyera məsləhətçiləri tərəfindən karyera planlamasında vacib addımlar, düzgün məqsədlərin təyin edilməsi, effektiv CV-nin yazılması və müsahibəyə hazırlıq qaydaları mövzularında təlimlər, master-klaslar təşkil edilib, səyyar konsultasiya xidməti təqdim edilib, müxtəlif mövzularda panel müzakirə və seminarlar keçirilib. Bundan başqa düşərgə müddətində iştirakçıların şəbəkələşməsi məqsədilə komanda quruculuğu və intellektual oyunlar, enercayzerlər təşkil edilib. Gənclər asudə vaxtlarında müxtəlif idman yarışlarında iştirak edib, stolüstü oyunlar oynayıblar.

Hər günün yekununda iştirakçılar üçün əyləncə və konsert proqramı təşkil olunub. Əyləncə proqramlarının birində gənclər Green Party edərək Yaşıl Dünya üçün öz həmrəyliklərini nümayiş etdiriblər. Düşərgənin sonuncu günü isə Şəki şəhərinin zəngin mədəniyyət və tarixinə ekskursiya ilə yadda qalıb.

“Gənclərin Məşğulluq Məktəbi” ilk dəfə 6-10 fevral 2023-cü il tarixlərində qış düşərgəsi formatında Mingəçevir şəhərində 120 gəncin iştirakı ilə baş tutub.