Ağdaşda “Əmək münasibətləri və məşğulluq: müasir çağırışlar və rəqəmsal həllər” mövzusunda konfrans keçirilib

Əmək və Əhalinin Sosial Müdafiəsi Nazirliyinin tabeliyindəki Dövlət Məşğulluq Agentliyi, Nazirlik yanında Dövlət Əmək Müfəttişliyi Xidməti və Ağdaş Rayon İcra Hakimiyyətinin birgə təşkilatçılığı ilə Ağdaşda konfrans keçirilib.

“Konstitusiya və Suverenlik İli”nə həsr olunmuş “Əmək münasibətləri və məşğulluq: müasir çağırışlar və rəqəmsal həllər” mövzusunda keçirilən konfransda Ağdaş Rayon İcra Hakimiyyətinin başçısı Orxan Hüseynzadə, Dövlət Məşğulluq Agentliyinin İdarə Heyətinin sədri Sadiq Əliyev, Dövlət Əmək Müfəttişliyi Xidmətinin rəisi Vəli Quliyev, Azərbaycan Həmkarlar İttifaqları Konfederasiyasının, Azərbaycan Sahibkarlar  (İşəgötürənlər) Təşkilatları Milli Konfederasiyasının nümayəndələri, işəgötürənlər iştirak edib.

Konfransı giriş sözü ilə açan Ağdaş RİH-nin başçısı Orxan Hüseynzadə rayonda  təşkil olunan bu konfransın əhəmiyyətini, əmək və məşğulluq sahəsində aparılan islahatlarla bağlı onların maarifləndirilməsində önəmini qeyd edib. Sonra panel müzakirələr keçirilib. “Əmək münasibətləri və məşğulluq sahəsində yeniliklər və perspektivlər” mövzusunda keçirilən ilk paneldə O.Hüseynzadə, V.Quliyev və S.Əliyev spiker qismində çıxış edib, mövzu ilə bağlı sualları cavablandırıblar.

S.Əliyev Dövlət Məşğulluq Agentliyində yeni konsepsiyaya uyğun olaraq karyera məsləhətçisi institutunun yaradıldığını, mütəmadi olaraq karyera məsləhətçiləri ilə işəgötürənlərin görüşlərinin keçirildiyini, onların tələblərinin öyrənildiyini bildirib. Qeyd edib ki, hazırda işəgötürənlərlə peşə hazırlığı, vakansiya bankı, əmək yarmarkalarının təşkili, birgə maliyyələşmə proqramı istiqamətində əməkdaşlıq edilir. Yaxın zamanda isə bu siyahıya kvotadan əlavə iş yerlərinin maliyyələşdirilməsi və məqsədli proqramlar da daxil ediləcək.

V.Quliyev son illər aparılan sosial islahatlar, bu islahatlar çərçivəsində Xidmətin həyata keçirdiyi tədbirlər barədə məlumat verib. Əmək münasibətlərinin rəsmiləşdirilməsi və bu münasibətlərin tənzimlənməsi üzrə qanunvericiliyə edilmiş son dəyişikliklərə əsasən  tətbiq edilən yeni rəqəmsal həllərdən, onların işəgötürənlər və işçilər üçün yaratdığı imkanlardan bəhs edib.

Ötən il əməyin mühafizəsi sahəsində 57 milli standartın təsdiq edildiyi, əməyin təhlükəsizliyi üzrə yeni layihələrdən olan “Nümunəvi işəgötürən” layihəsinin regionlarda, o cümlədən Ağdaşda tətbiqindən gözlənilən faydaları sahibkarların diqqətinə çatdırılıb. Bildirilib ki, əmək münasibətlərinin tənzimlənməsi və əməyin mühafizəsinin təmini istiqamətində edilən son qanunvericilik dəyişiklikləri, tətbiq edilən rəqəmsal həllər və başlanılan yeni layihələr işəgötürənlər tərəfindən əmək qanunvericiliyin pozulması hallarının qarşısının alınması üçün preventiv və proaktiv tədbirləri genişləndirir.

Konfransın ikinci paneli “Layiqli əməyin təmini: rəqəmsal həllər və yeni iş imkanları” mövzusunda olub. İlk olaraq Dövlət Məşğulluq Agentliyi və Dövlət Əmək Müfəttişliyi Xidmətinin fəaliyyəti ilə bağlı təqdimatlar edilib, daha sonra suallar cavablandırılıb.

Tədbirdə həmçinin Dövlət Məşğulluq Agentliyinin fəaliyyətindən və əməyin mühafizəsi sahəsində dövlət siyasətindən bəhs edən videoçarxlar nümayiş olunub. 

Həmçinin  sahibkarlarla birgə dəyirmi masa keçirilib, onları maraqlandıran suallar cavablandırılıb və təklifləri dinlənilib.

Bizi sosial mediada izləyin

Facebook: dma.gov.az

Instagram: dma.gov.az

Linkedin: Dövlət Məşğulluq Agentliyi

YouTube: dmasosialgovaz