Əhalinin sosial rifahının yüksəldilməsi, o cümlədən məşğulluğunun təmini dövlətimiz üçün dəyişməz prioritetlərindəndir.  Ölkəmizdə vətəndaşların layiqli məşğulluğunun təmin olunması, işsizliyin səviyyəsinin azaldılması üçün davamlı siyasət həyata keçirilir. Bu istiqamətdə dövlət siyasətini həyata keçirən Əmək və Əhalinin Sosial Müdafiəsi Nazirliyi və tabeliyindəki Dövlət Məşğulluq Agentliyinin konseptual yanaşması mövcuddur. İşsizliyin azaldılması və əhalinin məşğulluğunun təmin edilməsi üçün hazırlanan yeni konsepsiya özündə vətəndaşlara fərdi yanaşma, işəgötürənlərlə faydalı əməkdaşlıq, informasiya texnologiyalarının tətbiqi kimi mühüm komponentləri özündə ehtiva edir. 

Fərdi yanaşma prinsipi vətəndaşların məşğulluq imkanlarının qiymətləndirilməsi və buna müvafiq olaraq məşğulluq tədbirlərin görülməsini nəzərdə tutur. Agentlik tərəfindən yaradılan  karyera məsləhətçiləri institutu bizə müraciət edən vətəndaşların layiqli və dayanıqlı məşğulluğunun təmin olunmasına xidmət edir.

Fəaliyyətimizin əhəmiyyətli bir hissəsini məhz işəgötürənlərlə əməkdaşlıq təşkil edir. Məqsədimiz ondan ibarətdir ki, ölkədə fəaliyyət göstərən  işəgötürənlər kadr ehtiyaclarının qarşılanması baxımından  Agentliyin dəstəyini hiss etsinlər. Buna üçün işəgötürənləri və iş üçün müraciət edənlərin faydalana biləcəyi  bir platforma yaratdıq. “Əmək və məşğulluq” altsistemi, yəni ƏMAS adlandırdığımız bu platforma həm də məşğulluq xidmətlərinin rəqəmsallaşması baxımından inqilabi bir addımdır.

Məşğulluq siyasətinin ən mühüm istiqamətlərindən biri də  təhsilin əmək bazarının tələbləri ilə uyğunlaşdırılmasıdır. Biz hesab edirik ki,  bu, dayanıqlı məşğulluğun başlıca şərtlərindəndir. Ona görə də əmək bazarının data əsaslı hərtərəfli təhlilini aparır, insanların mövcud və gələcək çağırışlara uyğun peşələrə yönləndirilməsinə çalışırıq. Bu istiqamətdə ali və peşə yönümlü təhsil müəssisələri ilə əməkdaşlığı genişləndiririk. Hesab edirik ki,  Agentlik tərəfindən istifadəyə verilən “Məzunların məşğulluq reytinqi” kimi rəqəmsal platformalar bu prosesi daha da sürətləndirir.  

Ali Baş Komandanın rəhbərliyi ilə Vətən müharibəsindəki möhtəşəm zəfərdən sonra Böyük Qayıdış Proqramı çərçivəsində işğaldan azad edilmiş ərazilərə qayıdan vətəndaşlarımızın məşğulluğunun təmin edilməsi Agentliyin əsas prioritetlərindən biridir.  Bu, öz yurdlarına qayıdan vətəndaşların dayanıqlı məskunlaşmasının əsas şərtlərindəndir.

Dövlət Məşğulluq Agentliyini fəaliyyətinin mərkəzində “vətəndaş yönümlülük”  dayanır. Əhalinin sosial rifahının və həyat səviyyəsinin yüksəlməsi, işsizlik səviyyəsinin azalması, işsizlərin və sosial cəhətdən həssas əhali qruplarının sosial müdafiəsinin güclənməsi məqsədilə müxtəlif məşğulluq tədbirləri həyata keçirir, qısa və uzun müddətli layihələr reallaşdırırıq.  Agentlik qarşısına qoyduğumuz “tam məşğulluq” hədəfinə nail olmaq üçün bütün resursları mümkün olan ən yüksək səviyyədə səfərbər edirik. İnanıram ki, Agentlik olaraq öhdəmizə düşən, gözlənti və hədəfləri yüksək səviyyədə icra edib, böyük uğurlara nail olacağıq.

Mustafa Abbasbəyli

Dövlət Məşğulluq Agentliyi İdarə Heyətinin Sədri